НИЙТЛЭГ ҮНДЭСЛЭЛ

Энэхүү хавсралт гэрээгээр Даатгуулагч нь даатгалын зүйлийг гэрээнд заасан эрсдэлээс даатгуулж, даатгалын хураамж төлөх, Даатгагч нь даатгалын тохиолдол үүсэхэд учирсан хохирлыг хэлэлцэн тохирсны дагуу Даатгуулагчид нөхөн төлөх харилцааг зохицуулна.
Даатгуулагч нь Даатгагчид даатгалын тохиолдол буюу учирсан хохирлыг баталгаажуулахаар эрх бүхий байгууллагад хандаж шаардлагатай мэдээллийг авахыг энэхүү гэрээгээр зөвшөөрч байна.

НЭР ТОМЬЁО

Талууд гэрээнд заасан нэр томьёог дараах утгаар ойлгоно. Үүнд:

ДААТГАГЧ - Даатгалын тухай Монгол улсын хуулийн дагуу даатгалын үйл ажиллагаа эрхлэх тусгай зөвшөөрөл авсан, даатгалын зүйлийг болзошгүй эрсдэлээс даатгах “Мандал Даатгал” ХК-ийг;
ДААТГУУЛАГЧ - Өөрийн ашиг сонирхлын төлөө даатгалын зүйлээ даатгуулж, даатгагчтай гэрээ байгуулсан иргэн, хуулийн этгээд буюу даатгалын гэрээнд нэр бичигдсэн иргэн, хуулийн этгээд;
ДААТГАЛЫН ЗҮЙЛ – Даатгалын гэрээнд тусгагдсан тээврийн хэрэгслийг;
ДААТГАЛЫН ЭРСДЭЛ - Даатгалын зүйлд хохирол учруулж болох гэрээнд заасан нөхцөл, орчныг;
ДААТГАЛЫН ТОХИОЛДОЛ - Даатгалын зүйлд даатгалын гэрээнд заагдсан эрсдэлийн улмаас учирсан хохирол, тохиролцсон болзол бүрдэхийг;
ДААТГАЛЫН ХУРААМЖ - Даатгуулагч даатгалын зүйлээ даатгуулсны төлөө Даатгагчид төлөх төлбөрийг;
НӨХӨН ТӨЛБӨР - Даатгалын тохиолдол бий болсон нөхцөлд даатгалын зүйлд учирсан хохирлыг нөхөн төлөх зорилгоор Даатгагчаас Даатгуулагчид олгох мөнгөн болон мөнгөн бус хөрөнгийг;
ДААТГАЛЫН ҮНЭЛГЭЭ – Даатгалын зүйлийн зах зээлийн үнэлгээ буюу даатгалын хамгаалалтын дээд хэмжээг;
ЗАХ ЗЭЭЛИЙН ҮНЭЛГЭЭ – Санхүүгийн зохицуулах хорооны тусгай эрх бүхий үнэлгээний газрын тогтоосон үнэлгээг;
ДААТГУУЛАГЧИЙН ХАРИУЦАХ ХЭСЭГ – Даатгуулагч замын хөдөлгөөний дүрэм зөрчсөний улмаас тухайн хохирол учирсан болохыг цагдаагийн байгууллагын тодорхойлолтод дурдсан эсхүл жолооч өөрөө буруутай үйлдлээ мэдүүлсэн тохиолдолд харилцагчид олгох нөхөн төлбөрөөс хасагдах хувь хэмжээг;
НЭН ДАРУЙ – Улаанбаатарт тэр даруй, хөдөө орон нутагт 48 цагийг;
ДААТГАЛЫН ХУГАЦАА – Гэрээний хувьд /Гэрээгээр/ тохиролцсон үргэлжлэх хугацааг ойлгох бөгөөд энэхүү хугацаа нь даатгалын хураамж төлснөөр эсхүл хуваан төлөх нөхцөлтэйгөөр тохиролцсон бол эхний хураамж төлөгдсөнөөр хүчин төгөлдөр болно;
НӨХӨН ТӨЛБӨРИЙН МАТЕРИАЛ - Даатгалын тохиолдол үүсэхэд бүрдүүлэх материалыг;
ЖОЛООДОХ ЭРХГҮЙ ЭТГЭЭД - Тээврийн хэрэгсэл жолоодох эрхийн үнэмлэхгүй, үнэмлэхийн хүчинтэй хугацаа дууссан, шүүхийн тогтоолоор болон захиргааны шийтгэлийн журмаар тээврийн хэрэгсэл жолоодох эрхээ хасуулсан, тээврийн хэрэгсэл жолоодох эрхтэй боловч тухайн ангиллын тээврийн хэрэгсэл жолоодох эрхгүй этгээдийг ойлгоно;
АВТО ЗАМ – Тээврийн хэрэгсэл зорчиход зориулан барьсан замын байгууламж бүхий хатуу, хайрган хучилттай зам, гудамж, засаж, сайжруулсан болон ердийн хөрсөн замыг;
ЗАМЫН ХӨДӨЛГӨӨН - Зам дээр явганаар болон тээврийн хэрэгслээр хүн ба ачаа шилжих үйл ажиллагааг;
ЗОГСООЛ - Тээврийн хэрэгслийг бусдын хөдөлгөөнд саад болохооргүйгээр байршуулах боломжтой бөгөөд Монгол улсын замын хөдөлгөөний дүрмээр хориглосноос бусад нийтийн болон хувийн эзэмшлийн зам, талбайг;
ГОЛЫН ГАРАМ – Олон нийт тээврийн хэрэгслээр гаталж гардаг замтай огтлолцсон, урсгал устай голын гүехэн хэсгийг;
СУУРИН ГАЗАР – Монгол улсын замын хөдөлгөөний дүрмийн Хавсралт 1-ийн 5.3, 5.5-д заасан тэмдгээр тэмдэглэсэн, хүн ам төвлөрч суурьшсан нутаг дэвсгэрийг;
УРСГАЛ СӨРӨХ – Дараах тохиолдлуудыг ойлгоно:

Эсрэг хөдөлгөөнтэй хоёр эгнээгээр зорчдог замд, гүйцэж түрүүлэх буюу тойрон гарахаас бусад тохиолдолд эсрэг урсгалаар хөдөлгөөнд оролцох,
Хөдөлгөөний эгнээ нь тэмдэглэлээр тодорхойлогдсон гурван эгнээгээр зорчдог замын дунд эгнээ сөрөг хөдөлгөөнтэй бол түүний зүүн гар талын эгнээнд урсгал сөрж хөдөлгөөнд оролцохыг,
Эсрэг хөдөлгөөнтэй дөрөв буюу түүнээс олон эгнээгээр зорчдог замд эсрэг урсгал сөрж хөдөлгөөнд оролцохыг;
1. ХУРД ХЭТРҮҮЛЭХ – Мэргэжлийн байгууллагын дүгнэлт болон бусад баримтаар даатгуулагч хурдны тогтоосон хязгаарыг хэтрүүлсэн болох нь тогтоогдсон эсвэл жолооч өөрөө хурд хэтрүүлсэн тухайгаа мэдүүлсэн;
2. ХУРДНЫ ТОГТООСОН ХЯЗГААР - Суурин газарт цагт 60 км, суурин газрын гаднах замд цагт 80 км, тууш замд цагт 100 км, механикжсан тээврийн хэрэгслийг чирэх үед цагт 40 км, хүүхдийг зохион байгуулалттайгаар тээвэрлэх үед цагт 50 км, тууш замд мотоцикл, чиргүүлтэй суудлын тээврийн хэрэгсэл цагт 80 км, хорооллын дотор цагт 20 км;
3. БИЕТ ЗҮЙЛ - Даатгалын зүйл, түүний эд ангид гэмтэл учруулах хэмжээний даралт үзүүлэхүйц замын нүх, ховил, жалганаас бусад хатуу биетийг;
4. ДААТГАГЧ ГЭРЭЭГЭЭР ХҮЛЭЭСЭН ҮҮРГЭЭ БҮРЭН БИЕЛҮҮЛСЭН – Даатгагч даатгалын үнэлгээний хэмжээнд хүртэл нөхөн төлбөр олгосон эсхүл даатгалын зүйлтэй адил нэр, төрөл, чанарын эд хөрөнгө орлуулан өгсөн эсхүл даатгуулагчтай харилцан тохиролцож бүрэн сүйдсэн даатгалын зүйлийг сэргээн засуулсныг тус тус ойлгоно;
5. ДААТГАЛЫН НЭГ УДААГИЙН ТОХИОЛДОЛ – 72 цагийн дотор тасралтгүй нэг буюу түүнээс дээш удаа тохиолдсон үер, хүчтэй салхи гэх мэт байгалийн үзэгдлийг;
6. УЛААНБААТАР ХОТЫН ЗАМ - Улаанбаатар хот, дүүргийн нутаг дэвсгэр дэх авто замыг;
7. ОРОН НУТАГ БОЛОН ОРОН НУТГИЙН ЗАМ - Аймгийн нутаг дэвсгэр дэх хот, сум, суурин газар, фермерийн аж ахуй, газар тариалангийн үйлдвэрлэлийн баазыг хооронд нь холбосон болон тэдгээрийн доторх авто замыг.

ТЭЭВРИЙН ХЭРЭГСЛИЙН ХАМГААЛАЛТ

ТЭЭВРИЙН ХЭРЭГСЭЛД УЧРАХ ХОХИРОЛ

Монгол улсын нутаг дэвсгэрт дараах эрсдэлүүдийн улмаас даатгалын зүйлд учирсан хохирлыг Даатгагч энэхүү гэрээний нөхцөл, зүйл, заалтын дагуу Даатгуулагчид дараах хүснэгтэд заасан хувиас “Даатгуулагчийн хариуцах хэсэг”-ийг хассан дүнгээр нөхөн төлнө:

№	Даатгалын эрсдэл	Нөхөн төлбөр олгох хувь
1	Замын хөдөлгөөнд оролцох үеийн эрсдэл /Улаанбаатар хот/	Нөхөн төлбөр олгох хувь
1.1	Дээрээс биет зүйл унах, үсэрсэн зүйлд оногдох	100%
1.2	Тээврийн хэрэгсэлтэй мөргөлдөх, шүргэлцэх, тээврийн хэрэгсэлд мөргүүлэх, шүргүүлэх	100%
1.3	Хүн мөргөх, шүргэх	100%
1.4	Мал амьтан мөргөх, шүргэх	80%
1.5	Тээврийн хэрэгсэл, биет зүйл мөргөснөөс үүдэн онхолдох	80%
1.6	Биет зүйл мөргөх, шүргэх	100%
2	Зогсоолын эрсдэл /Улаанбаатар хот/
2.1	Зогсоолд орж гарах үедээ тээврийн хэрэгсэл мөргөх, шүргэх	80%
2.2	Зогсоолд орж гарах үедээ биет зүйл мөргөх, шүргэх	80%
2.3	Дээрээс биет зүйл унах	80%
2.4	Гуравдагч этгээдээс учруулсан хохирол /мөргүүлэх, шүргүүлэх, толины хулгай, бүрэн хулгай/	80%
2.5	Галын эрсдэл /гаднын нөлөөтэй/	80%
2.6	Барилгын нуралт, цөмрөлт	80%
2.7	Усанд автах	80%
3	Орон нутаг
3.1	Үсэрсэн зүйлд оногдох	80%
3.2	Тээврийн хэрэгсэлтэй мөргөлдөх, шүргэлцэх, тээврийн хэрэгсэлд мөргүүлэх, шүргүүлэх	80%
3.3	Мал амьтан мөргөх, шүргэх	80%
3.4	Мал амьтанд мөргүүлэх, шүргүүлэх	80%
3.5	Тээврийн хэрэгсэл, биет зүйл мөргөснөөс үүдэн онхолдох	80%
3.6	Биет зүйл мөргөх, шүргэх	80%
4	Байгалийн эрсдэл /Нэг удаагийн тохиолдолд олгох нөхөн төлбөрийн дээд хэмжээ 15 сая төгрөг хүртэл байна/
4.1	Шороон шуурганд өртөх	80%
4.2	Үер	80%
4.3	Мөндөрт өртөх	80%
4.4	Аянга дайрах, ниргүүлэх	80%
4.5	Хөрсний нуралт, гулгалт, цөмрөлт	80%
5	Даатгуулагчийн хариуцах хэсэг /Даатгуулагчийн буруутай үед хүснэгтэд заасан хувиас дараах хэсгийг хасаж тооцно/	20%

АЛБАН ЁСНЫ ТӨЛӨӨЛӨГЧИЙН ГАЗРААР ЗАСВАР, ҮЙЛЧИЛГЭЭ ХИЙЛГЭХ

(Зөвхөн харгалзах нэмэлт хураамж төлж даатгуулсан тохиолдолд)

БҮРЭН СҮЙРЭЛ

Даатгалын тохиолдлоос үүдэн даатгалын зүйл дахин ашиглах боломжгүй болсон эсхүл даатгалын зүйлийг засварлах зардал даатгалын үнэлгээний 90 хувиас дээш дүнтэй бол Даатгагч тухайн тохиолдлыг бүрэн сүйрэл гэж үзэн Даатгагчийн сонголтоор даатгалын үнэлгээний дүн (даатгуулагчийн хариуцах хэсгийг хассан дүнг) Даатгуулагчид нөхөн төлөх эсхүл зах зээлд зарагдаж буй адил загварын тээврийн хэрэгслийг худалдан авч өгөх байдлаар шийдвэрлэх ба сүйрсэн даатгалын зүйл үл маргах журмаар Даатгагчийн өмчлөлд шилжинэ.

НӨХӨН ТӨЛБӨР ОЛГОХГҮЙ БАЙХ НӨХЦӨЛ

Даатгагч дараах тохиолдлуудад аливаа нөхөн төлбөр олгох үүрэг хүлээхгүй:

Даатгалын гэрээнд заагаагүй эрсдэл, шалтгааны улмаас учирсан хохирол;
Даатгалын тохиолдлын улмаас даатгалын зүйлд учирснаас бусад хохирол буюу даатгуулагчийн олох ёстой байсан орлого, санхүүгийн хохирол;
Нийтийн ногоон байгууламж, хүүхдийн тоглоомын талбайд байрлуулсан байх үед болон түүгээр зорчих үед учирсан хохирол;
Төв замын нэгдүгээр эгнээнд зогссон байх үед учирсан хохирол;
Нэмэлт тоноглол, хуулганд учирсан хохирол; /хуулгыг нэмэлт хураамж төлж даатгуулсан бол уг заалт хамаарахгүй/;
Дугуйнд дангаар учирсан хохирол болон дугуйны хулгай;
Даатгалын зүйлийн өөрийн үйлдвэрийн эвдрэл, гэмтэл, доголдол болон ердийн элэгдэлтэй холбоотой хохирол;
Ослоос бусад шалтгаанаар дэлгэц, хөгжим, камер, хар хайрцаг зэрэг электрон тоног төхөөрөмжид учирсан хохирол;
Даатгуулагч эсхүл жолооч нь даатгалын тохиолдол бий болох нөхцөл орчныг бүрдүүлсэн, даатгалын зүйлд санаатайгаар учруулсан хохирол;
Даатгуулагч эсхүл жолооч ослын үед нэн даруй мэдэгдээгүй бөгөөд ослын шалтгааныг эрх бүхий байгууллагаар тогтоолгоогүй эсхүл тухайн цаг үед осол болсон гэдэг нь нотлогдоогүй, нотлох боломжгүй болсон хохирол;
Жолоодох эрхгүй этгээд тээврийн хэрэгслийг жолоодох, ашиглах үед учирсан хохирол;
Жолооч согтууруулах ундаа, мансууруулах эм, сэтгэцэд нөлөөт бодис хэрэглэсэн үед учирсан хохирол;
Тээврийн хэрэгслийг дор дурдсан зориулалтын бусаар ашигласны улмаас учирсан аливаа хохирол;
Тээврийн хэрэгслийг уралдаан тэмцээнд ашигласан, уул, усанд найдвартай эсэхийг эсхүл туулах чадварыг нь туршсан;
Тээврийн хэрэгслийг сургалтад болон туршилтад ашиглах;
Техникийн шаардлага зөрчсөн засвар хийсэн, тухайн тээврийн хэрэгсэл дээр зориулалтын бус эд анги тавих, тэдгээрийн үр дагавар;
Дайн байлдаан, үймээн, самуун, бослого, хөдөлгөөн, нийгмийн эмх замбараагүй байдал, төрийн эргэлт, террорист үйл ажиллагааны үр дагавар;
Буруутай этгээдээр учирсан хохирлоо төлүүлсэн тохиолдолд;
Жолооч ядарсан үедээ жолоо барьсны улмаас осол гарсныг цагдаагийн байгууллага тогтоосон эсхүл жолооч өөрөө нойрмоглосон зүүрмэглэсэн тухайгаа даатгагчид мэдүүлсэн тохиолдолд;
Тогтсон шавар, гол горхи, мөрөн нуур гатлах, тогтонги болон урсгал ус бүхий ус, мөсөн дээгүүр явах, мөстсөн гол гатлах үед учирсан хохирол;
Өвлийн улиралд буюу 12-р сарын 1-нээс 3-р сарын 1-ний хооронд зуны дугуйтай замын хөдөлгөөнд оролцох үед учирсан хохирол;
Зам тээврийн осол гарган зугтсан, ослын газрыг орхин явсан бол;
Даатгуулагч гэрээнд заасан үүргээ биелүүлээгүй;
Монгол улсын замын хөдөлгөөний дүрмийн нэг дүгээр хавсралтын 2.1-д заасан хориглох тэмдэг зөрчсөн;
Тээврийн хэрэгслийн бүрэн бүтэн байдлыг хангаагүй буюу явах эд анги, гэрэлтүүлэг, шил арчих механизмын эвдрэлтэй үед замын хөдөлгөөнд оролцох үеийн хохирол;
Замын хөдөлгөөний дүрмийн 8.9.г, 8.11, 11.3, 11.4, 11.5, 12.4, 12.5, 12.6 дах заалтуудыг зөрчсөн;
Өвлийн цагт хөдөлгүүр халаах болон бусад зориулалтаар ил гал гаргаснаас үүссэн хохирол;
Зорчих хэсгийн хашлага давсан, явган хүний зам буюу хөвөөгөөр явсан эсхүл байрлуулсан байх үед болон замгүй газраар явснаас үүдэн гарсан хохирол;
Замын хөдөлгөөний дүрмийн 14.6, 14.8, 14.9-д заасан газарт тээврийн хэрэгслийг байрлуулсан, эсхүл 14.1, 14.2, 14.3, 14.5, 14.7-д зөвшөөрсний дагуу байрлуулаагүйгээс үүдэн гарсан хохирол;
Даатгуулах үедээ тээврийн хэрэгслийн бодит зураг, мэдээллийг ирүүлээгүй эсхүл буруу зураг мэдээлэл өгсөн;

ДААТГАГЧ, ДААТГУУЛАГЧИЙН ЭРХ, ҮҮРЭГ

ДААТГАГЧИЙН ЭРХ, ҮҮРЭГ
- Даатгуулагч хууль болон гэрээгээр хүлээсэн үүргээ биелүүлээгүй тохиолдолд гэрээг цуцлах, эсхүл түүнд өөрчлөлт оруулахыг шаардах эрхтэй;
- Даатгуулагч даатгалын хураамжаа хуваан төлж байгаа тохиолдолд даатгалын хураамж хуваарийн дагуу төлөгдөөгүй хуанлийн 30 хоногоос хойш гарсан аливаа хохиролд хариуцлага хүлээхгүй байх эрхтэй;
- Даатгуулагч даатгалын хураамжаа хуваан төлж байгаа тохиолдолд Даатгуулагчид олгогдох нөхөн төлбөрийн дүнгээс даатгалын хураамжийн үлдэгдлийг суутгах эрхтэй;
- Даатгалын тохиолдол нь буруутай этгээдтэй үед Даатгуулагчийн хохирол нэхэмжлэх эрхийг тухайн тохиолдолтой холбогдон олгосон нөхөн төлбөр болон зардлын хэмжээгээр шилжүүлэн авах эрхтэй;
- Даатгалын зүйл бүрэн сүйрч Даатгагч Даатгуулагчид даатгалын үнэлгээг бүрэн төлсөн эсхүл сольж өгсөн тохиолдолд тухайн сүйрсэн зүйлийн өмчлөх эрхийг шилжүүлэн авах эрхтэй;
- Даатгуулагч даатгалын нөхөн төлбөр авахын тулд худал хуурмаг мэдүүлэг өгсөн, хуурамч бичиг баримт бүрдүүлсэн бол нөхөн төлбөр олгохоос татгалзаж, даатгагч гэрээг дангаар цуцалж, эрх бүхий байгууллагад шалгуулахаар өргөдөл, гомдол гаргах эрхтэй;
- Даатгалын хууль тогтоомж, гэрээний нөхцөлийг Даатгуулагчид танилцуулах үүрэгтэй;
- Даатгалын тохиолдол болсон үед нөхөн төлбөрийг хуулийн дагуу гэрээгээр тохиролцсон хэмжээгээр, зохих хугацаанд олгох үүрэгтэй;
- Монгол Улсын хуулиар зөвшөөрснөөс бусад нөхцөлд Даатгуулагчийн талаарх мэдээ, материалын нууцыг задруулахгүй байх үүрэгтэй.

ДААТГУУЛАГЧИЙН ЭРХ, ҮҮРЭГ

Даатгагч хууль болон гэрээний үүргээ биелүүлээгүй тохиолдолд гэрээг цуцлахаар шаардах эрхтэй;
Даатгалын тохиолдол болсон үед гэрээний нөхцөлийн дагуу нөхөн төлбөр олгохыг Даатгагчаас шаардах эрхтэй;
Иргэний Хуулийн 436.1-д заасны дагуу Даатгуулагч нь гэрээ байгуулахдаа өөрийн мэдэж байгаа аюул учруулах буюу даатгалын тохиолдол бий болоход нөлөөлж болох ноцтой нөхцөл байдал, түүнчлэн гэрээ байгуулснаас хойш бий болсон ийм нөхцөл байдлын талаар Даатгагчид нэн даруй мэдээлэх үүрэгтэй;
Даатгуулагч нь даатгалын хураамжийг гэрээний Даатгалын хураамж төлөх хуваарь хэсэгт заасан хуваарийн дагуу заасан хугацаанд төлөх, төлөлтийг хянах үүрэгтэй;
Хохирлыг нөхөн төлсний дараа буруутай этгээдээс хохирлыг нэхэмжлэн авах эрхээ Даатгагчид шилжүүлэх ба Даатгагчийн буруутай этгээдэд нэхэмжлэл гаргах үйл ажиллагаанд бүхий л талын туслалцаа үзүүлж хамтран ажиллах үүрэгтэй;
Даатгалын тохиолдол үүссэнийг нотлох аливаа зүйл, баримт бичиг, нөхөн төлбөрийн материалд хамаарах бусад баримт нотолгоог өөрчлөлт оруулалгүй хадгалах бөгөөд даатгалын зүйл эвдэрсэн эсхүл гэмтсэн тохиолдолд тухайн эвдэрсэн, гэмтсэн хэсгийг Даатгагчийн зөвшөөрөлгүйгээр өөрийн хяналтаас гаргахгүй буюу устгахгүй байх үүрэгтэй;
Учирсан хохирлын шалтгаан болон хэмжээг тогтооход шаардлагатай нотлох баримт, дүгнэлт, гэрээний нөхөн төлбөрийн материал хэсэгт заасан баримт бичиг, мэдээ мэдээллийг Даатгагчид бүрэн гүйцэд өгөх үүрэгтэй;
Даатгуулагч даатгал хийлгэхдээ эсхүл нөхөн төлбөр авахдаа худал хуурмаг мэдүүлэг өгөхгүй байх, хуурамч бичиг баримт бүрдүүлж өгөхгүй байх, хэлэх ёстой зүйлийг нуун дарагдуулахгүй байх үүрэгтэй;
Даатгалын тохиолдол болсон тухай Даатгагчид нэн даруй мэдэгдэх, баримтжуулах үүрэгтэй;
Даатгалын нөхөн төлбөрийн материалыг гэрээний ерөнхий нөхцөл хэсгийн 3-д заасан хугацаанд бүрдүүлж ирүүлэх эсхүл гэрээний ерөнхий нөхцөл хэсгийн 4-д заасан үндэслэлээр уг хугацааг сунгасан бол тухайн сунгасан хугацаанд нөхөн төлбөрийн материалыг бүрдүүлж ирүүлэх үүрэгтэй.

ГЭРЭЭНИЙ ЕРӨНХИЙ НӨХЦӨЛ

ГЭРЭЭНИЙ ХҮЧИН ТӨГӨЛДӨР БАЙДАЛ

Энэхүү даатгал нь зөвхөн Монгол улсын нутаг дэвсгэрт гарсан даатгалын тохиолдлын хувьд хүчин төгөлдөр үйлчилнэ.

НӨХӨН ТӨЛБӨР МЭДЭГДЭХ ПРОЦЕСС

Даатгалын тохиолдол болсон үед хохирлын тухай Даатгуулагч Даатгагчид нэн даруй мэдэгдэх үүрэгтэй.
Даатгуулагч хохирол болсон өдрөөс хойш хуанлийн 60 хоногийн дотор Даатгагчид нөхөн төлбөрийн шаардлагатай материалыг ирүүлнэ.
Даатгуулагч дээрх 3-р заалтад заасан үүргээ хүндэтгэн үзэх шалтгаан /баримт бичиг, тодорхойлолт өгөх байгууллага хугацаа хожимдуулсан буюу шалтгаангүйгээр олгохоос татгалзсан зэрэг/-ийн улмаас гүйцэтгэж чадахгүй тохиолдолд Даатгагчид энэ талаар бичгээр мэдэгдэж, нэмэлт хугацаа тогтоолгоно.
Даатгагч гэрээнд заасны дагуу шаардлага хангасан бүрэн гүйцэд материалыг хүлээн авснаас хойш ажлын 10 хоног хүртэлх хугацаанд нөхөн төлбөрийг шийдвэрлэнэ.

НӨХӨН ТӨЛБӨРИЙН МАТЕРИАЛ

Даатгагч нь дараах баримтыг үндэслэн Даатгуулагчид даатгалын нөхөн төлбөрийг олгоно. Үүнд:
- Даатгалын гэрээ, даатгалын баталгаа,
- Даатгуулагчийн өргөдлийн маягт, албан бичиг, онлайнаар ирүүлсэн хүсэлт (бүрэн гүйцэд бөглөсөн),
- Осол болон хохирлын талаар холбогдох мэргэжлийн байгууллагын дүгнэлт, тодорхойлолт /Замын цагдаа, Галын алба, Шүүх/,
- Хохирлын хэмжээг тогтоосон хохирол үнэлэгчийн бичгээр гаргасан дүгнэлт, акт материал;
- Хохирлын фото зураг, видео бичлэг.
- Даатгагчийн шаардсан бусад материал.

ДАВХАРДСАН ДААТГАЛ

Даатгалын тохиолдол учрахад даатгалын зүйлийг хэд хэдэн Даатгагчид зэрэг даатгуулсан тохиолдолд Даатгагч тус бүр Даатгалын үнэлгээний хувьд оролцсон хувь хэмжээгээр хамтарсан хэлбэрээр нөхөн төлнө.

БУРУУТАЙ ЭТГЭЭДЭЭС НӨХӨН ТӨЛБӨР НЭХЭМЖЛЭХ ЭРХ ШИЛЖҮҮЛЭХ

Даатгалын тухай хуулийн 8.7-д заасны дагуу буруутай этгээдээс төлбөр нэхэмжлэх Даатгуулагчийн эрх нь даатгалаар олгогдсон нөхөн төлбөр, түүнтэй холбогдон гарсан зардлын хэмжээгээр Даатгагчид шилжинэ.

НӨХӨН ТӨЛБӨРИЙН НӨХЦӨЛ

Даатгуулагч нь энэхүү Даатгалын гэрээний хүчинтэй хугацаанд нөхөн төлбөр авах бүрд Даатгалын үнэлгээ нь тухайн авсан нөхөн төлбөрийн дүнгээр буурна.
Даатгалын эрсдэлийн улмаас тээврийн хэрэгсэлд учирсан хохирлыг хохирол үнэлгээний компанийн үнэлгээний тайланг үл хамааран Даатгагчийн сонголтоор мөнгөн эсхүл гэмтсэн эд анги, хэсгүүдийг сэлбэн засварлах, нөхөн сэргээх, солих хэлбэрээр нөхөн төлнө.
Даатгуулагч тээврийн хэрэгслийг зах зээлийн бодит үнэлгээгээр даатгуулаагүй тохиолдолд Даатгуулагчийн мэдүүлсэн үнэлгээг зах зээлийн бодит үнэлгээнд харьцуулсан хувиар нөхөн төлбөрийг тооцно.
Даатгалын зүйл, түүний тодорхой хэсгүүдэд учирсан хохирлыг Даатгагч солих, сэлбэх эсхүл бодит үнээр нөхөн төлсөн тохиолдолд тухайн эд зүйл нь Даатгагчийн эзэмшилд шилжинэ.
Даатгалын зүйлийн үйлдвэрийн эд ангийг сольсон тохиолдолд тухайн сольсон эд ангийн хохирлын хувьд үйлдвэрийн үндсэн эд ангийн үнийн дүнгээр тооцон нөхөн төлбөрийг олгоно.
Даатгуулагч нэмэлт хураамж төлж албан ёсны төлөөлөгчийн газраар засвар, үйлчилгээ хийлгэх эрх авсан тохиолдолд Даатгалын эрсдэлийн улмаас тээврийн хэрэгсэлд учирсан хохирлын нөхөн төлбөрийг тухайн тээврийн хэрэгслийн албан ёсны төлөөлөгчийн газраас засвар, үйлчилгээ авах байдлаар шийдвэрлүүлэх боломжтой.
Даатгалын хугацаанд даатгалын гэрээгээр олгогдох нөхөн төлбөрийн дээд хэмжээ нь тээврийн хэрэгслийн зах зээлийн бодит үнэ болон даатгалын үнэлгээ хоёрын аль бага нь байна.
“Байгалийн эрсдэл”-ийн нэг удаагийн тохиолдлоор олгох нөхөн төлбөрийн дээд хэмжээ нь тээврийн хэрэгслийн зах зээлийн бодит үнэ болон 15 сая төгрөг хоёрын аль бага нь байна.
Даатгагч дараах тохиолдлуудад даатгалын зүйлд учирсан хохирлын үнийн дүнгийн 50% хүртэл дүнгээс хариуцах хэсгийг хассан дүнгээр нөхөн төлбөрийг олгоно. Үүнд:
1. Суурин газар хоорондын замд (орон нутагт) зорчиж байхад болсон ослын шалтгаан зураг, бичлэг, бусад баримтаар нотлогдохгүй байгаа эсхүл цагдаагийн байгууллагаас жолоочийг согтуурсан, мансуурсан эсэхийг шалгаагүй болон осолтой холбоотой үзлэг хэмжилт хийгээгүй эсхүл цагдаагийн байгууллагаас ослын тодорхойлолтыг сольсон бол;
2. Монгол улсын замын хөдөлгөөний дүрмийн 23.4 дэх заалтыг зөрчсөн буюу тээврийн хэрэгслийг гүйцэд зогсоогүй байхад хаалга нээсэн, зорчигч буулгасан эсхүл суулгасан, хаалгаа гүйцэт хаалгүй хөдөлгөөнөө эхлүүлснээс үүдэн гарсан хохирол;
3. Тээврийн хэрэгслийг зогсоолд байрлуулсан байх үед тээврийн хэрэгсэлд хохирол учирсан ба тухайн зогсоолд болсныг камерын бичлэгээс өөрөөр нотлох боломжгүй бөгөөд камерын бичлэг байхгүй/олдоогүй тохиолдолд.
4. Тээврийн хэрэгслийг зөвшөөрөгдсөн зогсоол дээр стандартын бус байрлуулсан /зогсоолын зорчих хэсэг дээр байрлуулсан, зогсоолын хаалт, хашлага давуулан байрлуулсан/;
5. Обод, дугуйны үйлдвэрийн стандартад заасан хэмжээг зөрчсөн, өндөрлөгөө хийсэн үед онхолдох;
Даатгагч нь даатгалын хураамж төлөх төлбөрийн хуваарьтай гэрээний нөхөн төлбөрийг шилжүүлэхдээ нийт үлдэгдэл авлагын дүнг нийт тооцсон нөхөн төлбөрийн дүнгээс суутгаж олгоно.
Энэхүү Даатгалын гэрээний дагуу олгох даатгалын нөхөн төлбөрийн тооцооллыг даатгалын зүйлийн зах зээлийн үнийн дүн болон даатгалын үнэлгээнээс хамаарсан хувь тэнцүүлэлт хийх, гэрээний “Тээврийн хэрэгслийн хамгаалалт”-ийн хүснэгтэд заасан хувиас даатгуулагчийн хариуцах хэсгийг хасах дарааллаар хийнэ.
Даатгалын зүйлд “Байгалийн эрсдэл”-ийн улмаас учирсан хохирлыг барагдуулахдаа даатгуулагчийн хариуцах хэсгийг хассан дүнгээр тооцож нөхөн төлбөрийг олгоно.

ДААТГАЛЫН ГЭРЭЭГ ЦУЦЛАХ, ДУУСГАВАР БОЛОХ НӨХЦӨЛ

Даатгалын гэрээг хугацаанаас нь өмнө цуцлах:

21.1. Даатгуулагчийн төлсөн хураамжаас даатгалтай байсан хугацааны хураамжийг хассан зөрүүг Даатгуулагчид эргүүлэн төлнө. Хэрэв даатгуулагчийн төлсөн даатгалын хураамж нь даатгалын гэрээний хүчинтэй хугацаанд ногдох даатгалын хураамжаас бага байх тохиолдолд Даатгуулагч зөрүү дүнг Даатгагчид төлнө.

21.2. Хэрэв даатгуулагч даатгалын хүчинтэй хугацаанд нөхөн төлбөр авсан тохиолдолд буцаан олголт байхгүй. Хураамжийг хуваан төлж буй үед үлдэгдэл төлбөрийг төлж барагдуулна.

Гэрээг Даатгагчийн санаачилгаар цуцлах:

Даатгуулагч энэ гэрээгээр олгогдох нөхөн төлбөрийг хууран мэхлэх замаар авах гэж оролдсон нь илэрсэн;
Даатгалын хураамж гэрээнд заасан хуваарийн дагуу төлөгдөөгүй хуанлийн 30 хоног хэтэрсэн бөгөөд даатгалын гэрээний хугацаанд нөхөн төлбөр аваагүй бол тухайн даатгалын гэрээг Даатгагчийн санаачилгаар цуцална.
Даатгалын хураамж гэрээнд заасан хуваарийн дагуу төлөгдөөгүй хугацааг тоолохдоо тогтоосон он, сар өдрөөс эхлэн тоолно.
Даатгагч нь гэрээний ерөнхий нөхцөл хэсгийн 2-р заалтад заасны дагуу гэрээг цуцлахдаа, гэрээ цуцлагдсан талаарх мэдэгдлийг мессежээр гэрээнд бичигдсэн утасны дугаараар эсхүл Даатгуулагчийн иргэний үнэмлэх дээр бичигдсэн албан ёсны хаягаар хүргүүлэх бөгөөд Даатгуулагч тухайн хаяг дээрээ байхгүй байгаагаас үүдэн гарах хариуцлагыг Даатгуулагч өөрөө хүлээнэ.

Гэрээ нь дараах тохиолдолд хугацаанаас өмнө дуусгавар болно. Үүнд:

Даатгагч гэрээгээр хүлээсэн үүргээ бүрэн биелүүлсэн;
Талууд харилцан тохиролцсон;
Хууль тогтоомж болон гэрээнд заасан бусад үндэслэлээр.

Мэдэгдэл:

Талууд гэрээтэй сайтар танилцсан бөгөөд гэрээний заалтуудыг бүрэн ойлгож зөвшөөрсөн болно.

ОНЦГОЙ АНХААРАХ НӨХЦӨЛ

1. Даатгалын тохиолдол үүссэн үед ослын газраас хөдлөхгүйгээр НЭН ДАРУЙ буюу Улаанбаатарт тэр даруй, хөдөө орон нутагт 48 цагийн дотор (утасны сүлжээтэй газар тэр даруй, сүлжээгүй газар бол сүлжээтэй газарт хүрсэн даруй) даатгагч руу 7575-2000 (24 цагийн турш ажиллана) утсаар мэдэгдэж чиглэл авах.

2. Даатгуулагч даатгалын тохиолдлын үед ямар нэг шалтгаанаар нэн даруй даатгагчтай холбогдох боломжгүй болсон бол ослын газраас хөдлөхгүйгээр тухайн орчин нөхцөл, ослын учир шалтгааныг нотлохуйц зураг, бичлэг (тухайн ослын талаар тайлбарласан яриа хийсэн байх) ЗААВАЛ хийж баримтжуулах ёстой ба даатгагчтай утсаар холбогдох боломжтой болсон даруй даатгагчийн 7575-2000 утас руу мэдэгдэж чиглэл авах.

3. Даатгуулагч нэмэлт хураамж төлж албан ёсны төлөөлөгчийн газраар засвар, үйлчилгээ хийлгэх эрх аван Даатгалын гэрээ байгуулсан бол Даатгалын тохиолдлын үед Даатгагч нөхөн төлбөрийг тээврийн хэрэгслийн албан ёсны төлөөлөгчийн газруудын засвар, үйлчилгээний үнийн саналыг үндэслэн олгоно, бусад тохиолдолд хохирол үнэлгээний компанийн үнэлгээний үнийн дүнг үндэслэн олгоно.

4. Энэхүү Даатгалын гэрээний дагуу олгох даатгалын нөхөн төлбөрийн тооцооллыг даатгалын зүйлийн зах зээлийн үнийн дүн болон даатгалын үнэлгээнээс хамаарсан хувь тэнцүүлэлт хийх, гэрээний “Тээврийн хэрэгслийн хамгаалалт”-ийн хүснэгтэд заасан хувиас даатгуулагчийн хариуцах хэсгийг хасах дарааллаар хийнэ.

5. “Байгалийн эрсдэл”-ийн нэг удаагийн тохиолдолд олгох нөхөн төлбөрийн дээд хэмжээ 15 сая төгрөг хүртэл байна.

Даатгуулагч та дээрх нөхцөлүүдийг дагаж мөрдөөгүй тохиолдолд нөхөн төлбөр авах боломжгүй болох эрсдэлтэйг анхаарна уу.

Бүтээгдэхүүн

Хувь хүний гэнэтийн ослын даатгал

Хүүхдийн даатгал

Дотоод аяллын даатгал